Gel Gönül Azm-i Reh-i Beyt Huda Eyleyelim

Gel gönül, azm-i reh-i Beyt-i Hudâ eyleyelüm!
Sa’y idüp Merve’ye tahsîl-i sefâ eyleyelüm!

İşimüz eylesün altun dü cihanda Mevlâ;
Nâv-dân-ı zer’ün altında dua eyleyelüm!

Arafât’un sürelüm hâkine yüzler, gözler,
Surh-rûy olmağa iksîr recâ eyleyelüm!
Leb-i lebbeyk-zen u çeşm-i sirişk-efşânı,
Kûçe-i hâhiş-i rahmetde gedâ eyleyelüm!

Kâse kâse çeh-i Zemzem’den içüp âb-ı hayat,
Cân-ı pür-illeti leb-rîz-i şifâ eyleyelüm!

Alalum gevher-i rahmet, virelüm nakd-i günâh;
Dili, sevdâ-ger-i bâzâr-ı Minâ eyleyelüm!

Bâb-ı sultân-ı serâ-perde-i lev lâk’e varup,
Kaddimüz, bâr-ı tazarru’la dütâ eyleyelüm!

Virelüm Ravza-i pâkine salât ile selâm;
İllet-i cürme, şefâate devâ eyleyelüm!

Olalum hâk-i der-i Ravza’sına nâsıye-sâ;
Cebhemüz, maşrık-ı hurşîd-i hüdâ eyleyelüm!

Geçürüp bendeleri defterine nâmumızı;
Yirimüz Haşr’de de zîr-i Livâ eyleyelüm!

Defter-i cürmi yakup eyleyelüm hâkister,
Nâbiyâ! Ayine-i kalbe cilâ eyleyelüm!