Kaside, Her Yeri Hüsnün Gülistân Eylemiş

Her yeri hüsnün gülistân eylemiş
Her tarafda bâğ u bostân eylemiş

Zînet etmiş zîr ü pes evsâf ile
Her sıfâtdan zâtın ilân eylemiş

Bunca evsâfdan görünen bir cemâl
Bir cemâli bunca elvân eylemiş

Hep kitâb-ı Hakk'dır eşyâ sandığın
Ol okur kim seyr-i evtân eylemiş

Hüsnünü izhâr eder bunca sıfât
Zâtına insânı bürhân eylemiş

Hakk'ı istersen yürü insâna bak
Şems-i zât yüzünde rahşân eylemiş

Hakk yüzü insân yüzünden görünür
Zât-ı Rahmân şeklin insân eylemiş

Nice görsün şems-i vechin çün anın
Zâhid-i a'mâ ki tuğyân eylemiş

İçini almış anın zerk u riyâ
Gönlünü Şeytân perîşân eylemiş

Her nazarda gördüğü Hakk 'ârifin
Her görüşde nice ihsân eylemiş

Hakk'ı anlamak değil âsân ola
'Âdetâ Hakk böyle erkân eylemiş

Sâlik erince kemâle şöyle bil
Yüreğin baş bağrını kân eylemiş

Anlayınca zât-ı Hakk'ı zevk ile
Bu Niyâzî nice seyrân eylemiş