Hakîkat Câmesin Sanma Cihânda Her Beden Giydi

Hakîkat câmesin sanma cihânda her beden giydi
Libâs-ı müste'ârı râh-ı Hakk'dan geçen giydi

Libâs-ı 'aşkı her ki sağa sola meyleden giymez
Anı ancak tarîk-i müstakîm üzre giden giydi

Abâ-yı Mustafâ'yı hiç kimse giymedi ammâ
Reh-i 'aşkında terk-i cân eden Veys el-Karen giydi

Açan cân gözlerin ammâ gül-i pîrâhen-i Yûsuf
Anı ol pîr-i Ken'ân sâhibü'l beytü'l hazen giydi

Cihân-kıymet olan âl-i abâ tâcın nice yıllar
Boyun büküp erenler meclisinde diz çöken giydi

Soyun kesret libâsından eriş "el-fakru fahrî"ye
Bu fahr-i pür-safâyı câm-ı vahdetden içen giydi

Riyâ-pûşân ne mümkündür 'aşk u sevdâ kisvesin giymek
Harâbât kûşesine dost deyu postun seren giydi

Tarîk-i 'aşk içinde hırka-yı tecrîdi ey Hazmî
Cenâb-i Pîr Hüsâmeddîn Uşşâkî Hasen giydi

https://defter-i-ussak.blogspot.com/2021/03/hakikat-camesin-sanma-cihanda-her-beden-giydi.html