4 Ocak 2010 Meşki

Sultân-ı rusul şâh-ı mümeccedsin efendim
Bî-çârelerle devlet-i sermedsin efendim
Dîvân-ı ilâhîde ser-âmedsin efendim
Menşûr-i "le 'amrük"le müeyyedsin efendim
Sen Ahmed ü Mahmûd u Muhammedsin efendim
Hak'dan bize sultân-ı müeyyedsin efendim

Tâbiş-dih-i ervâh-ı mücerred güherindir
Mâliş-geh-i ruhsâr-ı melek hâk-i derindir
Âyîne-i dîdâr-ı tecellî nâzarındır
Bû Bekr Ömer Osmân ü Alî yârlarındır
Sen Ahmed ü Mahmûd u Muhammedsin efendim
Hak'dan bize sultân-ı müeyyedsin efendim

Hutben okunur minber-i iklîm-i bekâda
Hükmün tutulur mahkeme-i rûz-i cezâda
Gülbank-i kudûmûn çekilir arş-ı Hudâ’da
Esmâ-yı şerîfin anılır arz ü semâda
Sen Ahmed ü Mahmûd u Muhammedsin efendim
Hak'dan bize sultân-ı müeyyedsin efendim

Ol dem ki velîlerle nebîler kala hayrân
Nefsî deyü dehşetle kopa cümleden efgân
Ye’s ile 'usâtın ola ahvâli perîşân
Destûr-i şefâ'atla senindir yine meydân
Sen Ahmed ü Mahmûd u Muhammedsin efendim
Hak'dan bize sultân-ı müeyyedsin efendim

Bir gün ki dalup bahr-i gama firkate gittim
Elden yitürüp kendimi bî-hôdluğa yitdim
Isyânım anıp âkıbetimden hazer etdim
Bu matla'ı yâd eyledi bir seyyid işitdim
Sen Ahmed ü Mahmûd u Muhammedsin efendim
Hak'dan bize sultân-ı müeyyedsin efendim

Ümmideyiz ye's ile âh eylemeyiz biz
Sermâye-i îmânı tebâh eylemeyiz biz
Bâbın koyup ağyâra penâh eylemeyiz biz
Bir kimseye sâyende nigâh eylemeyiz biz
Sen Ahmed ü Mahmûd u Muhammedsin efendim
Hak'dan bize sultân-ı müeyyedsin efendim

Bîçâredir ümmetlerin ısyânına bakma
Dest-i red urup hasretle dûzaha yakma
Rahm eyle amân âteş-i hicrânına yakma
Ezcümle kulun Gâlib-i pür-cürmü bırakma
Sen Ahmed ü Mahmûd u Muhammedsin efendim
Hak'dan bize sultân-ı müeyyedsin efendim

Defter-i Uşşak - https://defter-i-ussak.blogspot.com/2015/12/sen-ahmed-u-mahmud-u-muhammedsin-efendim.html

Sanman bizi kim beste-dil-i nefs-i gavîyiz
Hâk-i kadem-i âl-i abâ Mustafavîyiz
Ne havf-ı emîrân biliriz ne bedevîyiz
Râzî-şüde-i hükm-i kader(1) Murtazavîyiz
İkrârımıza ser veririz ahde kavîyiz
Biz şâh-ı velâyet kuluyuz hem Alevîyiz

Nakş-ı hevesi safha-i dilden sile geldik
Tâ da’vî-i mihr-i neseb-i pâk ile geldik
Kurbân-ı ilâhî olup İsmâil’e geldik
Çün bezm-i kıdemden dile geldik bile geldik
İkrârımıza ser veririz ahde kavîyiz
Biz şâh-ı velâyet kuluyuz hem Alevîyiz

Âlemlere isnâ aşer ebrâc değil mi
Her biri ser-i mihr ü mehe tâc değil mi(2)
Tîr-i siteme cümlesi âmâc değil mi
Da'vâ-yı muhâbbet buna muhtâc değil mi
İkrârımıza ser veririz ahde kavîyiz
Biz şâh-ı velâyet kuluyuz hem Alevîyiz

Âvân-ı Yezîd’in hele hasmânıyız el-hak
La’net-keş-i îmân-ı dil ü cânıyız el-hak
Bu ma’rekenin Sâm u Nerîmânıyız el-hak
Evlâd-ı Hüseyn'in kulu kurbânıyız el-hak
İkrârımıza ser veririz ahde kavîyiz
Biz şâh-ı velâyet kuluyuz hem Alevîyiz

Yokdur bizi takdîre havâricde liyâkat
Ednâmız eder âlemi pür lerze-i dehşat
Takdîre ne çâre bu imiş hükm-i meşiyyet
Cân bâşı fedâ eylesen Es’ad ne seâdat
İkrârımıza ser veririz ahde kavîyiz
Biz şâh-ı velâyet kuluyuz hem Alevîyiz

(1) Bazı nüshalarda "hükm-i kazâ" şeklinde.
(2) Bazı nüshalarda "Her birisi mihr ü mehe sertâc değil mi" şeklinde.

Defter-i Uşşak - https://defter-i-ussak.blogspot.com/2015/10/seyh-galib-dedenin-bir-mersiyesi.html

Can-ı candır Hazret-i Ahmet Muhammed Mustafâ
Tende hem rûh-i revânımdrı Aliyyü'l-Murtazâ

Kurre-i ayn-i Muhammed Şah Hasan ibn-i Ali
Hem Hüseyn-i Müctebâ Şah-ı Şehid-i Kerbelâ

Seyyidü's-süccâd Ali Zeyne'l-abâ Bâkır Veli

Vak'a-yı Şâh-ı Şehîd-i Kerbelâ'yı gûş edip
Âh edip yandı gönül ehl-i dilân ağlar bugün

Sîne sûzân dîde giryân kalbi nâlândır bu ân
Mâtemengîz gamlıdır dil ârifân ağlar bugün

Hep celâlin cilvesine mazhar oldu kâinât
Şems-i tâbân-ı cihânla âsumân ağlar bugün

Aşk-ı Ehl-i Beyt ile yan nevha-ger ol Tâciyâ
Derdlidir mahzûn gönüller âşıkân ağlar bugün

Defter-i Uşşak - https://defter-i-ussak.blogspot.com/2015/10/hayrullah-taceddin-efendinin-bir.html

Zâlimler el urup hep şemşîr-i can-rübâya
Kasd etdiler serâpâ "Evlâd-ı Mustafâ"ya
Devrân olup müsâid ol kavm-i bî-hayâya
Îsâl olundu bîdâd serhadd-i intihâya
Kimler eder tehammül yâ Rab bu ibtilâya
Âmâc edüb vücûdun bin nâvek-i kazâya
Düşdü Hüseyn atından sahrâ-yı Kerbelâ'ya
Cibrîl var haber ver "Sultân-ı Enbiyâ"ya

Cûş eyleyüb belâya mânend-i mevc-i tûfân
Keştî-i "Ehl-i Beyt"i kıldı şikest ü vîrân
Maktûl olup serâser ashâb-ı âl-i zîşân
Yektâ-rev oldu ol mâh çün âfitâb-ı rahşân
Her yandan etdi savlet hınzîr-veş yezîdân
Sertâbepâ vücûdun zahm eyleyüb kızıl kân
Düşdü Hüseyn atından sahrâ-yı Kerbelâ'ya
Cibrîl var haber ver "Sultân-ı Enbiyâ"ya

Ashâb u âlinin hep kibârı vü sıgârı
Bir bir kılub önünde azm-i huzûr-i Bârî
Dil-teng edüb susuzluk tâ arşa oldu sârî
Etfâl-i seyyidâtın feryâd-ı bî-karârı
Her yüzden etdi tazyîk a'dâ o şehriyârı
Âhir çıkub elinden dâmân-ı ihtiyârı
Düşdü Hüseyn atından sahrâ-yı Kerbelâ'ya
Cibrîl var haber ver "Sultân-ı Enbiyâ"ya

Yârân olub serâpâ mest-i mey-i şehâdet
Meydânda kaldı tenhâ ol mihr-i evc-i hâcet
Bu hâl olub adûya sermâye-i cesâret
Etrâfın aldı birden ol kavm-i pür-dalâlet
Yetmiş iki yerinden mecrûh olub nihâyet
Bundan ziyâde harbe Hakk vermeyüb icâzet
Düşdü Hüseyn atından sahrâ-yı Kerbelâ'ya
Cibrîl var haber ver "Sultân-ı Enbiyâ"ya

Ol şâh-ı dîn-penâhı tenhâ görünce düşmân
Etdi hücûm u savlet şiddetle her tarafdan
Bir hâle vardı âhir zahm-ı hadeng-i âhen
Mânend-i kasr-ı cennet cisminde oldu rûşen
Envâ'-ı yârelerden her cânibinde revzen
Kâzım olub nihâyet bî-tâb harb ederken
Düşdü Hüseyn atından sahrâ-yı Kerbelâ'ya
Cibrîl var haber ver "Sultân-ı Enbiyâ"ya

Defter-i Uşşak - https://defter-i-ussak.blogspot.com/2015/10/koniceli-kazm-pasann-bir-mersiyesi.html

Kadrim ola berter şeref-i nâd-ı Ali'den
Nusrat bulayım dembedem imdâd-ı Ali'den
Meydân-ı mehabbetdeki feryâd-ı Ali'den
Dü dîde-i Zehrâ iki şehzâd-ı Ali'den
Yâ Rab beni dûr eyleme evlâd-ı Ali'den

Hâk-i der-i vâlâları iksîr-i hakîkat
Ruh-sûde olan âşık-ı şûrîdeye devlet
Onlardan olur âlem-i âsâra inâyet
Bir bendesi şâhân-ı felek-mertebe elbet
Yâ Rab beni dûr eyleme evlâd-ı Ali'den

Âhir bu harâbâta gelir lerzîş-i vîrân
İşkeste olur câmları rindî perîşân
Her neş'enin elbette humârın çeker insân
Ol dâd ü sitâd mecma'ına vardığımız an
Yâ Rab beni dûr eyleme evlâd-ı Ali'den

Bende edeli cân u dili Âl-i Abâ'ya
Ham-geşte-i ta'zîm olamam çarh-ı dü-tâya
Meyleyleyemem kevkebe-i dâr-ı fenâya
Besdir bana dünyâda ve ukbâda bu pâye
Yâ Rab beni dûr eyleme evlâd-ı Ali'den

Evsâf-ı Ali oldu benim ma'den-i kânım
Evlâd-ı ciğerpâresidir cân ü cânânım
Ârif dil-i erbâb-ı hakîkatde mekânım
Bu nutk-i şerîf oldu benim vird-i zebânım
Yâ Rab beni dûr eyleme evlâd-ı Ali'den

Defter-i Uşşak - https://defter-i-ussak.blogspot.com/2015/10/kethudazade-arif-efendinin-imam-ali.html

Kurretü'l ayn-i Habib-i Kibriyâ'sın ya Hüseyn
Nûr-i çeşm-i Şah-ı merdan Mürtezâ'sın yâ Hüseyn

Hem ciğerpare-i Zehrâ, Fatıma Hayrünnisâ
Ehl-i Beyt-i Müctebâ Al-i Abâ'sın yâ Hüseyn

Sana gülle dokunan ümmid eder mi mağfiret
Gonca-i gülşen seray-i Mustafa'sın yâ Hüseyn

Ehl-i mahşer dest-i Hayder'den içerken kevseri
Sen susuzlukla Şehid-i Kerbela'sın yâ Hüseyn

Vâlidin şanında dendi 'La fetâ illa Ali'
Mazhar-ı sırr-ı etemm-i 'La fetâ'sınyâ Hüseyn

Halkan ve hulkan müşabihsin Resulullah'a sen
Nâzenin-i enbiya ü evliyâsın yâ Hüseyn

Seyyid-i Şûbban-ı cennet dendi şânında senin
Pişivay-ı etkıyâ vü asfiyâsın yâ Hüseyn

Sad hezârân lânet olsun ol yezidin cânına
Nice kasd etti sana nûr-i Hûda'sınyâ Hüseyn

Kıl şefaat Ârif'e ceddin Muhammed aşkına
Arsa-i mahşerde makbul-er-recâsın yâ Hüseyn

https://defter-i-ussak.blogspot.com/2015/10/kurretul-ayn-i-habib-i-kibriyasn-ya.html

Gözüm ki kâne boyandı,
Şerâbı neyleyeyim?
Ciğer ki odlara yandı,
Kebabı neyleyeyim?

Açıldı mü"mine cennet,
Saçıldı âleme rahmet,
O gün de bî-çâre Sâffet,
Hisâbı neyleyeyim?

Resul-i Mücteba nesli Rıfâi Seyyid Ahmed'dir
Aliyyel Mürteza sulbi Rifai Seyyid Ahmed'dir

Muhammed'le Ali Zehrâ Hüseyin ile Hasen asa
Eder atşânını eskâ Rifai Seyyid Ahmeddir

İmaman dude-i misli gözetirler hemen vaslı
Tarikat râhının aslı Rifai Seyyid Ahmeddir

Şeriat bâbıdır ol tarikat ma'rifettir gel
Hakîkat pîrimizdir gel Rifai Seyyid Ahmed'dir

Rıza bâbın gözet pirin hakikat kıl hemen seyrin
Senin işte destgîrin Rifai Seyyid Ahmed'dir

Yevmim nah vel Medine teral envar
Vağsudhima nebine tahal Muhtar 

Meded Allah sana sundum elimi
Bizi ol dost Muhammed'den ayırma
Gayrı kime arz edeyim halimi
Bizi ol dost Muhammed'den ayırma

Ebubekir, Ömer, Osman, Ali'nin
Rehberidir bunlar İslâm dîninin
Hürmetine Mevlâm cümle velînin
Bizi ol dost Muhammed'den ayırma 

Enbiyâ, evliyâ çıkar köşküne
Mest olurlar anber ile misk ile
İmâm Hüseyin'in demi aşkına
Bizi ol dost Muhammed'den ayırma

Sinan Ümmi söyler sözü gümansız
Nideler cesedi içinde cansız
Hûri gılman gerekmez bana onsuz
Bizi ol dost Muhammed'den ayırma

Defter-i Uşşak - https://defter-i-ussak.blogspot.com/2017/06/bizi-ol-dost-muhammedden-ayirma.html