Lebin Vasfında Sultânım Dehân Âşık Zebân Âşık

Lebin vasfında sultânım dehân âşık zebân âşık
Sana ey mihr-i tâbânım zemîn âşık zamân âşık

Vücûd-i âleme bâis vücûdun olduğu zâhir
Mine'l-evvel ile’l-âhir sana kevn ü mekân âşık

Eğer mahfî eğer peydâ vü ger âkil eğer şeydâ
Senin şevkin ile cânâ nihân âşık ayân âşık

Usûl-i sôfiyân ile budur âyin-i etvârı
Döner çarh-ı tahayyürde ider devr-i revân âşık

Gören âşık cemâl-i bâ-kemâlin görmeyen âşık
O gül ruhsâra billâhî Hüdâvend-i cihân âşık

Eyâ sultân-ı mahbûbân buyur erbâb-ı aşk içre
Desinler İbn-i Neccâr'a budur ibn-i filân âşık

https://defter-i-ussak.blogspot.com/2018/06/lebin-vasfinda-sultanim-dehan-asik-zeban-asik.html