Bu Demdir Tab'ımın Devr-i Melâlî

Hezârân per açup reng-i ziyâdan
Ufûl etmiş güneş sahn-ı semâdan
Şebistân-ı elem hâlî sadâdan
Gönül pür-girye hâl-i inzivâdan

Bu demdir tab’ımın devr-i melâli
Sever zulmetle rûhum hasbihâli
Sadâlar duymanın var ihtimâli
Karanlıklarda a'mâk-ı hafâdan

İlâhî-meşrebim vahdet-perestim
Şarâb-ı cilve-i hayretle mestim
O sagardır ki ziynetsâz-ı destim
Dolar humhâne-i Âl-i Abâ'dan

Uzakdan yalvarup ebr-i bahâre
Dedim gel şöyle meylet bir kenâre
Hüseyn'imden haber ver kalb-i zâre
Eğer geçdinse deşt-i Kerbelâ'dan

Ne beklersin kalup ey bâd-ı şebhîz
Demâdem turra-i ezhârı tehzîz
Getir lutfeyle bir bûy-i dilâviz
Meşâm-ı câna kabr-i Mürtazâ'dan

Ne mümkün sevmemek Sâmih Hüseyn'i
Kabûl eyler mi insan böyle şeyni
Resûl-i Kibriyâ'nın nûr-i ayni
Muazzezdir bizim'çün enbiyâdan